Um Bakkafjörð - stutt lýsing

 

Byggð hefur verið á Langanesströnd frá landnámi eins og lýst í Landnámabók. Með Langanesströnd (Ströndinni) er átt við ströndina frá Fossdal á Gunnólfsvíkurfjalli norður undir Langanesi og að Stapaá milli Viðvíkur og Strandhafnar í Vopnafirði. Þorp tók að myndast á Bakkafirði kringum aldamótin 1900 í tengslum við fiskveiðar, vinnslu og verslun. Á Bakkafirði bjuggu í mars 2014 alls 84 íbúar. Þeim hefur smám saman farið fækkandi á umliðnum árum. Sögu byggðar og búskapar á Langanesströnd er hægt að kynna sér hér annars staðar hér á síðunni.

 

Lífið á Bakkafirði snýst að mestu um fiskinn í sjónum og af veiðum á honum hafa margir lífsviðurværi sitt. Á Bakkafirði vinna flestir við eitthvað tengt fiskveiðum, stunda sjómennsku eða vinna í landi við fiskvinnslu eða beitningu. Á Bakkafirði eru eingöngu trilluútgerð og byggjast veiðarnar aðallega á þorski, fyrir utan grásleppuvertíðina á vorin. Stærsta fiskverkunin er Toppfiskur ehf., en hjá fyrirtækinu starfa um 10-15 manns. Á Bakkafirði eru einnig nokkur fjölskyldufyrirtæki, sem stunda útgerð og fiskvinnslu. Nánar segir frá útgerðarsögu staðarins annars staðar á síðunni.

 

Enn er búskapur í sveitinni, þótt aðeins sé svipur hjá sjón miðað við t.d. miðja síðustu öld. Á Langanesströnd hefur búskapur alla tíð snúist nær eingöngu um sauðfjárræktun. Hin síðari ár hefur athygli manna m.a. beinst að ræktun annars konar áa, með tekjur af laxveiði í huga, enda þykja aðstæður í Bakkaflóa einstaklega vel til þess fallnar. Í Bakkaá veiddist t.d. stærsti lax, sem veiðst hefur á stöng á Íslandi. Nánar segir frá sveitinni í kring annars staðar hér á síðunni.

 

Ýmislegt merkilegt er hægt að skoða og fræðast um á Langanesströnd.